1Ki 10 | NdeIBE | STEP | INdlovukazi yaseShebha yathi isizwile ngodumo lukaSolomoni lokubambelela kwakhe ebizweni likaJehova, yaya kuye ukuba imlinge ngemibuzo enzima.

1 Kings 10

Indlovukazi yeSheba Yethekelela uSolomoni

1 INdlovukazi yaseShebha yathi isizwile ngodumo lukaSolomoni lokubambelela kwakhe ebizweni likaJehova, yaya kuye ukuba imlinge ngemibuzo enzima. 2 Ekufikeni kwayo eJerusalema iqhuba udwende olukhulu – lamakamela ethwele iziyoliso, lezinqwabanqwaba zegolide, lamatshe aligugu – yeza kuSolomoni yakhuluma laye ngakho konke lokho okwakusengqondweni yayo. 3 USolomoni wayiphendula yonke leyomibuzo yayo; akuzange kube lalutho olwaba nzima enkosini ukuthi iyichasisele ngalo. 4 INdlovukazi yaseShebha isiyibonile yonke inhlakanipho kaSolomoni lesigodlo ayesakhile, 5 ukudla okwakusetafuleni lakhe, ukuhlaliswa kwezikhulu zakhe, izinceku zakhe lezambatho zazo, abaphathi benkezo bakhe, lemihlatshelo yokutshiswa ayenzela uJehova ethempelini, yaphela amandla.

6 Yathi enkosini, “Imibiko ebifika ezindlebeni zami elizweni lami ngengqubelaphambili langenhlakanipho yakho, iqotho. 7 Kodwa angizange ngikukholwe lokho ngaze ngafika mina ngokwami njalo ngazibonela ngawami amehlo. Ngempela, bekukuncinyane kakhulu abangitshele ngakho. 8 Yeka intokozo abalayo abantu bakho! Ziyathokoza iziphathamandla zakho, zona ezima phambi kwakho zizwe inhlakanipho yakho! 9 Udumo kalube kuJehova uNkulunkulu wakho, yena othokoze ngawe wakubeka esihlalweni sobukhosi bako-Israyeli. Ngenxa yothando olunaphakade lukaJehova ku-Israyeli, ukubekile waba yinkosi, ukuze ugcine ukwahlulela ngemfanelo lokulunga.”

10 Yanika inkosi igolide elingamathalenta alikhulu lamatshumi amabili, lenqwabanqwaba zeziyoliso lamatshe aligugu. Akuzange kulethwe iziyoliso ezinengi kangako futhi njengalezo iNdlovukazi yaseShebha eyazipha iNkosi uSolomoni.

11 (Imikhumbi kaHiramu yaletha igolide livela e-Ofiri; njalo yethula lemithwalo emikhulu yamapulanka amahle lamatshe aligugu. 12 Inkosi yasebenzisa amapulanka amahle njengezinsika zethempeli likaJehova kanye lesigodlo sobukhosi, lokwenza imihubhe lemiqangala yabahlabeleli. Akuzange kubuye kube lamapulanka amahle amanengi kangako angeniswayo elizweni loba abonwayo selokhu kwaba yilelolanga.)

13 INkosi uSolomoni yanika iNdlovukazi yaseShebha yonke into eyayiyifisa leyayicelayo, ngaphandle kwalokho ayinika khona kuphuma esigodlweni. Yasisuka lodwendwe lwayo yabuyela elizweni lakibo.

Udumo lukaSolomoni

14 Isisindo segolide elalizuzwa nguSolomoni minyaka yonke lalingamathalenta angamakhulu ayisithupha lamatshumi ayisithupha lesithupha,

15 kungabalwa imithelo yabathengisayo labathenga bethengisa kanye leyayivela emakhosini wonke ama-Arabhu kanye lababusi belizwe.

16 INkosi uSolomoni yenza amahawu amakhulu angamakhulu amabili ngegolide elikhandiweyo; lilinye lingelegugu lamakhulu ayisithupha. 17 Wenza njalo amanye amahawu amancinyane angamakhulu amathathu ngegolide elikhandiweyo, lilinye lilegugu lokuthathu kwegolide. Inkosi yawafaka esigodlweni seHlathi laseLebhanoni.

18 Inkosi yasisenza isihlalo sobukhosi esikhulu sisekelwa ngezimpondo zendlovu sihuqwe ngegolide elihle. 19 Isihlalo sobukhosi sasilezinyathelo eziyisithupha, ngemva kwaso phezulu siyindingilizi, emaceleni aso womabili silezeyamelo zezingalo, yileso silesilwane eceleni kwaso. 20 Izilwane ezilitshumi lambili zazimi ezinyathelweni eziyisithupha, kusithi esisodwa esinyathelweni ngasinye ngapha langapha emaceleni esinyathelo. Akukho okufanana lalokhu okwake kwenziwa lakuwuphi umbuso. 21 Zonke inkezo zokunatha zenkosi uSolomoni zazingezegolide, lezimpahla zonke zendlini eSigodlweni seHlathi laseLebhanoni zazingezegolide elicengekileyo. Akulalutho olwalwenziwe ngesiliva, ngoba isiliva sasithiwa silegugu elincinyane ezinsukwini zikaSolomoni.

22 Inkosi yayilemikhumbi yokuthengiselana eminengi eyayiselwandle iphathisana lekaHiramu. Yayiphenduka kanye ngemva kweminyaka emithathu ithwele igolide, isiliva kanye lezimpondo zendlovu lezindwangu lenkawu.

23 INkosi uSolomoni yayisedlula wonke amakhosi emhlabeni ngenotho langenhlakanipho. 24 Umhlaba wonke wadinga wafisa ukuba ubonane loSolomoni ukuze lowo lalowo azizwele inhlakanipho ayiphiwa nguNkulunkulu wayifaka enhliziyweni yakhe.

25 Iminyaka leminyaka, kwakusithi lowo omethekelelayo eze ethwele isipho – kuyizinto ezenziwe ngegolide langesiliva, lezambatho, izikhali leziyoliso, amabhiza kanye lezimbongolo.

26 USolomoni waqoqa izinqola zokulwa lamabhiza; wayelezinqola zokulwa eziyinkulungwane elamakhulu amane, amabhiza azinkulungwane ezilitshumi lambili ayewagcina emadolobheni awezinqola zempi amanye egcinwe kuye eJerusalema. 27 Inkosi yenza isiliva sajayeleka njengamatshe eJerusalema lomsedari waba mnengi njengomkhiwa wesikhamore emawatheni ezintaba. 28 Amabhiza kaSolomoni ngayevela eGibhithe laseKhuwe – abokuthengiselana besikhosini babewathenga eKhuwe.

29 Bangenisa elizweni inqola yempi ivela eGibhithe ngamashekeli esiliva angamakhulu ayisithupha kanye lebhiza ngamashekeli alikhulu lamatshumi amahlanu. Babuya bawedlulisa bayawathengisela wonke amakhosi amaHithi kanye lawama-Arami.